Editions Bakame yahize Abanyafurika mu kwandika ibitabo by’abana
Umwihariko
Bakame Editions muri make
Bakame Editions ni iyandikiro ry’ibitabo ryigenga kandi ridaharanira inyungu, rizwi mu kwandika ubuvanganzo bugenewe abana n’urubyiruko b’u Rwanda. Ibitabo byandikwa mu Kinyarwanda kandi bikagurishwa ku giciro giciriritse kugira ngo bigere ku bana benshi.
Mu rwego rwo kuteza imbere umuco wo gusoma, Bakame Editions ishishikaza ikanatera inkunga urubuga rwo gusoma mu mashuri abanza. Bakame Editions kandi ihugura abarimu b’ayo mashuri abanza ku byerekeye uburyo bwo guteza imbere umuco wo gusoma.
Intego za Bakame Editions
• Guhanga no guteza imbere ubuvanganzo bushingiye ku muco nyarwanda
• Guteza imbere ubuvanganzo gakondo mu nyandiko
• Guteza imbere umuco wo gusoma
• Gufasha abahanzi n’abashushanyi kumenyekanisha ibihangano byabo
• Kumenyana no gushyikirana n’andi mashyirahamwe afite intego nk’iza Bakame Editions
| 1995 | Ishingwa rya Bakame Editions |
| 1996 | Bakame Editions yasohoye bwa mbere ibitabo byayo 4 |
| 2001 | Bakame Editions yahawe ishimwe ry’icyubahiro n’urubuga rw’ibishushanyo BIB Blatislava |
| 2002 | Bakame Editions yemewe n’Inama y’Abaminisitiri nk’ishyirahamwe ridaharanira inyungu, rifitiye Abanyarwanda akamaro |
| 2005 | Bakame Editions yubatse icyicaro cyayo mu Murenge wa Remera, mu Karere ka Gasabo |
| 2005 | Igitabo cya Bakame Editions “Ubucuti bw’imbeba n’inzovu” cyahawe igihembo cyitwa Bologna Ragazzi New Horizon |
| 2006 | U Rwanda rwabaye umunyamuryango wa 70 w’Ishyirahamwe Mpuzamahanga ry’Ibitabo by’Abana n’Urubyiruko IBBY |
| 2008 | Igihembo IBBY-Asahi |
Umudali mushya w’ishimwe BOP wahawe Bakame Editions, Kigali, Rwanda
Ku itariki ya 25 kugeza kuri 28 Werurwe 2013, Ihuriro mpuzamahanga ngaruka mwaka ry’ibitabo by’abana n’urubyiruko i Bologna mu gihugu cy’Ubutaliyani, ryakoze isabukuru y’imyaka 50 rimaze rishinzwe.
Ni muri urwo rwego abarihagarariye bashyizeho ku ncuro ya mbere mu mateka yaryo igihembo cy’ishimwe cyiswe BOP- Bologna Prize for the Best Children’s Publishers of the year. Ni ukuvuga: Ishimwe rya Bologna rihabwa Iyandikiro ry’ibitabo by’abana n’urubyiruko ryashimwe muri uyu mwaka, ryahahwe umwe mu basohoye ibitabo by’abana n’urubyiruko washimwe kuri buri mugabane w’isi.
Ni muri iyo sabukuru y’imyaka 50 ku mugoroba wo ku wa 26 Werurwe 2013, iryo shimwe ryatangiwe mu nyubako yitwa Teatro comunale.
Ku mugabane w‘ Afurika, ishimwe BOP ry’uwasohoye ibitabo by’abana n’urubyiruko muri uyu mwaka wa 2013 ryegukanywe na Editions Bakame, Kigali, Rwanda.
Dushimye byimaze yo Iyandikiro ry’ibitabo Editions Bakame!
